بهلوان مكسور

انا بهلوان بين قلوب العذارى برمي حبالي و ألف و أدور

بطلع من حب أدخل في حب أسرع من فهد و أجمل من الطيور

غالي و بهوه الغالي و البنات عندي ماس و دهب و بلور

أشتري من دي ضحكه و دي بسمة و دي ضلمه و دي نور

على أجسامهم بحفر تاريخي و في أجمل من كده سطور

قالو زمان البنات زي الورود بس نسيوا يقولوا منين جابوا العطور

جابوها من خلطة بهلوان عاشق يعرف يخللي الوحشة بدور

يكتب كلام و يعزف ألحان على مسامع البنت دماغها تدور

و لما يسيبها يا عيني يا ويلها تدبل و تبأه زي الأرض البور

أن عشت من غير اللي بحبها أضعف و يصيب خيالي فتور

و حد مجمل الجنه و مخليها صعبة غير انها بيت الحور

غريب بين الناس بس بيني و بين نفسي بنفسي فخور

مش عارف بلعب بقلوبهم ولا هما اللي لعبوا بيه و خللوني صبور

بس أديني بتنطط على حبال القلوب و مع كل هدر ببني قصور

فقير و عندي ألف قصر و كل قصر مبني في قلب قبور

ياه يا عمر على اللعبة بدلت قلبي و بأيت بهلوان مكسور